Беларускі калегіюм традыцыйна ажыццяўляе набор навучэнцаў у кастрычніку. Мы фармуем некалькі групаў паводле ўзроўню, выбраных кірункаў, творчых цікавасцяў. 

У 2018-19 годзе БК прапануе навучанне па чатырох кірунках:

Філасофія/літаратура. Гэты праект не мае аналагаў у краіне, але мае глыбокія карані у еўрапейскай універсітэцкай традыцыі. У ім філасофія з літаратурай  яднаюцца ў адно цэлае, разглядаюцца як грунт і апірышча мадэрнай ідэнтычнасці. У аснове творчая майстэрня Валянціна Акудовіча “Тэорыя і практыка пісьма”. Акцэнт у ёй робіцца на творчасці: не проста навука пісання літаратурных і філасофскіх тэкстаў, але і тварэнне самога сябе, сваёй асобы, уласнай суб’ектнасці.

Інтэлектуальныя гісторыі Усходняй Еўропы. Работа з беларускай інтэлектуальнай традыцыяй як часткай больш шырокага кантэксту: усходнееўрапейскага, еўрапейскага, глабальнага. Асаблівая ўвага звернутая на традыцыі суседзяў (польская, украінская, літоўская, расейская). У аснове семінар Ігара Бабкова “Гісторыя беларускай думкі”, задача якога “вучыць і вучыцца думаць, — у прадуктыўным сутыкненні з іншымі эпохамі, другімі культурамі, адрознымі ідэнтычнасцямі”.

Параўнальныя даследаванні цывілізацый. Унікальная праграма, адмысловы адказ на выклікі сучаснасці (вайна культураў, канфлікт цывілізацый, узвышэнне Кітая і Індыі). У аснове семінар Ірыны Дубянецкай “Культурныя коды цывілізацыі Захаду”, спроба кадыфікацыі і перачытання складовых элементаў еўрапейскай традыцыі, дахрысціянскіх, хрысціянскіх, мадэрных.

Культурная аналітыка. Праграма, арыентаваная на асэнсаванне наяўнай культурнай сітуацыі, выяўленне магчымых накірункаў яе развіцця і ўвасабленне гэтага разумення ў моцных медыйных тэкстах. Стратэгічная мэта: спрыянне з’яўленню новай генерацыі аналітыкаў, здольных забяспечыць змястоўную і драйвовую экспертызу актуальнай культуры для шырокага кола сучаснікаў і саўдзельнікаў. У аснове аўтарскі практыкум Максіма Жбанкова “Вербальны дызайн культурнага тэкста”.

Навучанне бясплатнае.

Сертыфікат БК не замяняе дыплом аб вышэйшай адукацыі.

Прыём на навучанне ажыццяўляецца па выніках сумоўя. Каб запісацца на сумоў’е, трэба да 27 кастрычніка 2018 г. (уключна) запоўніць і адаслаць анкету:

Пытанні пра паступленне і навучанне ў Беларускім калегіюме

1. Ці магу я абраць адразу некалькі кірункаў?

Так, вы можаце абраць некалькі кірункаў і падаць на іх заяўкі, згодна з умовамі паступлення. Падчас навучальнага году ёсць магчымасць далучыцца да іншай групы альбо сфармаваць індывідуальную праграму: запісацца на асобныя курсы-семінары ў выпадку наяўнасці вольных месцаў.

2. Ці ёсць конкурс пры паступленні?

Так. Набор навучэнцаў ажыццяўляецца на конкурснай аснове і базуецца на выніках сумоўя і/або прадстаўленых тэкставых матэрыялаў.

3. У які час адбываюцца заняткі?

Асноўныя заняткі спецыялізацыі адбываюцца ўвечары (пасля 18.30) адзін раз на тыдзень. Папярэдне – па аўторках.

4. Колькі трэба вучыцца ў БК?

Тэрмін навучання складае 1-2 гады. Пасля заканчэння 2 гадоў аўдыторных заняткаў, навучэнцы могуць працягваць удзел у праектах і практычных курсах БК.

5. Колькі чалавек набіраецца ў групы?

У залежнасці ад кірунку, у групу набіраецца 15-30 чалавек.

6. У мяне засталіся пытанні. Як я магу атрымаць на іх адказы?

Вы можаце скантактавацца з намі і атрымаць дадатковую інфармацыю праз info@belcollegium.org ці facebook/facebook.